Sayyid Husain Imbichikoya Thangal

മതപണ്ഡിതനും ആത്മീയാചാര്യനും സാമൂഹിക പ്രശ്നപരിഹാരങ്ങളിൽ ശ്രദ്ധേയമായ ഇടപെടലുകൾ നടത്തിയ വ്യക്തിയുമായിരുന്നു സയ്യിദ് ഹുസൈൻ ഇമ്പിച്ചിക്കോയ തങ്ങൾ. അവേലത്ത് വലിയ തങ്ങൾ എന്ന പേരിൽ അറിയപ്പെട്ടിരുന്ന അദ്ദേഹത്തെ മത-സാമൂഹിക പ്രശ്നങ്ങൾക്കും ആത്മീയ ചികിത്സയ്ക്കുമായി കേരളത്തിനകത്തുനിന്നും പുറത്തുനിന്നും നിരവധി പേർ സമീപിച്ചിരുന്നു.

സയ്യിദ് മുഹമ്മദ് പൂക്കോയ തങ്ങളുടെയും ചായമ്മ എന്നറിയപ്പെട്ടിരുന്ന സയ്യിദത്ത് ചെറിയ ബീവി ബാഫഖിയുടെയും മൂത്ത പുത്രനായി പൂനൂരിനടുത്ത അവേലത്ത് തറവാട്ടിൽ ജനിച്ചു. സയ്യിദ് അബ്ദുൽ ഖാദിർ അഹ്ദൽ തങ്ങളുടെ ജ്യേഷ്ഠസഹോദരനായിരുന്നു.

മടവൂർ ദർസിൽ കുഞ്ഞി മാഹിൻ കോയ മുസ്‌ലിയാരുടെ കീഴിലായിരുന്നു മതപഠനം. പഠനശേഷം ആത്മീയ ചികിത്സാരംഗത്തും ജനങ്ങളുടെ വിവിധ പ്രശ്നങ്ങൾക്ക് പരിഹാരം നിർദേശിക്കുന്നതിലും സജീവമായി. അവേലത്ത് തറവാടിന്റെ കോലായിലിരുന്ന് സന്ദർശകരുടെ ആവശ്യങ്ങളും പരാതികളും കേൾക്കുകയും പരിഹാരനിർദേശങ്ങൾ നൽകുകയും ചെയ്യുന്നതായിരുന്നു അദ്ദേഹത്തിന്റെ പ്രധാന ദിനചര്യ.

നൂൽ മന്ത്രിച്ചുനൽകുക, ഉറുക്ക് നൽകുക, വെള്ളം മന്ത്രിച്ചുനൽകുക തുടങ്ങിയ ആത്മീയ ചികിത്സാരീതികൾ സ്വീകരിച്ചിരുന്ന അദ്ദേഹത്തെ വിവിധ രോഗങ്ങൾക്കും പ്രയാസങ്ങൾക്കും പരിഹാരം തേടി ജനങ്ങൾ സമീപിച്ചിരുന്നു. സാമൂഹിക തർക്കങ്ങളിൽ നീതിപൂർവമായ തീരുമാനങ്ങൾ സ്വീകരിക്കുന്നതിനുള്ള വേദിയായും അവേലത്ത് തറവാട് മാറിയിരുന്നു. മോഷണവുമായി ബന്ധപ്പെട്ട കേസുകളിലും മറ്റു തർക്കങ്ങളിലും തീർപ്പുകൽപ്പിക്കുന്നതിനായി ആളുകൾ അദ്ദേഹത്തെ സമീപിച്ചിരുന്നു.

നാട്ടിലെ മതകാര്യങ്ങളിലും ആവശ്യമായ നിർദേശങ്ങളും മാർഗദർശനവും നൽകിയിരുന്ന അദ്ദേഹം സുന്നത്ത് ജമാഅത്തിന്റെ പ്രവർത്തനങ്ങൾക്കായി സ്വന്തം ഭൂമി സുന്നി മസ്ജിദിന് വഖ്ഫ് ചെയ്തു. പൊതുവേദികളിലും പൊതുപ്രവർത്തനങ്ങളിലും അദ്ദേഹത്തിന്റെ സാന്നിധ്യം കുറവായിരുന്നെങ്കിലും വിവിധ പണ്ഡിതന്മാരുമായും ആത്മീയ നേതാക്കളുമായും ബന്ധം സ്ഥാപിച്ചിരുന്നു. ഇക്കാരണത്താൽ തന്നെ അവേലത്ത് തറവാട് പണ്ഡിതന്മാരുടെ സന്ദർശന കേന്ദ്രമായിരുന്നു. അഹ്‌മദ് കോയ ശാലിയാത്തി, ഖുതുബി മുഹമ്മദ് മുസ്‌ലിയാർ, വാണിയമ്പലം അഹ്‌മദ് മുസ്‌ലിയാർ, കോട്ടുമല അബൂബക്കർ മുസ്‌ലിയാർ തുടങ്ങിയവർ അവരിൽ പ്രധാനികളായിരുന്നു. മടവൂർ സി.എം. വലിയുല്ലാഹിയും തറവാട്ടിലെ പതിവ് സന്ദർശകനായിരുന്നു.

പിതാവ് സയ്യിദ് മുഹമ്മദ് പൂക്കോയ തങ്ങളിൽനിന്നാണ് ആത്മീയ മാർഗങ്ങൾ സ്വീകരിച്ച അദ്ദേഹം, ഖാദിരിയ്യ, രിഫാഇയ്യ, നഖ്ശബന്ദിയ്യ, ചിശ്തിയ്യ എന്നീ സൂഫി ത്വരീഖത്തുകളുമായി ബന്ധം പുലർത്തിയിരുന്നു.

വൈത്തിരി ആറ്റക്കോയ തങ്ങളുടെ മകളെയായിരുന്നു വിവാഹം ചെയ്തത്.

റമദാൻ അഞ്ചിന് വെള്ളിയാഴ്ച, 75-ാം വയസ്സിൽ സയ്യിദ് ഹുസൈൻ ഇമ്പിച്ചിക്കോയ തങ്ങൾ വഫാത്തായി.