Sayyidah Cheriya Beevi

മതനിഷ്ഠയും ജീവകാരുണ്യ പ്രവർത്തനങ്ങളും കൊണ്ട് ശ്രദ്ധേയയായ സാദാത്ത് കുടുംബാംഗവും അവേലത്ത് തറവാടിന്റെ പ്രധാന ആശ്രയവുമായിരുന്നു സയ്യിദത്ത് ചെറിയ ബീവി. അവേലത്ത് സയ്യിദ് മുഹമ്മദ് പൂക്കോയ തങ്ങളുടെയും മക്കളായ സയ്യിദ് ഹുസൈൻ ഇമ്പിച്ചിക്കോയ തങ്ങൾ, സയ്യിദ് അബ്ദുൽ ഖാദിർ തങ്ങൾ എന്നിവരുടെയും മത-സാമൂഹിക പ്രവർത്തനങ്ങൾക്ക് പിന്നിൽ വലിയ സ്വാധീനം ചെലുത്തിയ വ്യക്തിയായിരുന്നു അവർ.

വടകരയ്ക്കടുത്ത ഇരിങ്ങൽ കോട്ടക്കലിലെ ബാഫഖി ഖബീലയിൽപ്പെട്ട ആയാട്ട് തറവാട്ടിലാണ് ജനിച്ചത്. ബീകുഞ്ഞി ബീവിയായിരുന്നു മാതാവ്. ദീനീ ചിട്ടകൾ പാലിച്ചിരുന്ന കുടുംബാന്തരീക്ഷത്തിൽ വളർന്ന അവർ ചെറുപ്പം മുതൽ തന്നെ ആരാധനാകർമങ്ങളിൽ പ്രത്യേക താൽപര്യം പുലർത്തിയിരുന്നു.

കാരക്കാട്ടിലെ പ്രമുഖ ആത്മീയ നേതാവായിരുന്ന സയ്യിദ് ഹുസൈൻ കോയ തങ്ങളുടെ മൂത്തമകൻ സയ്യിദ് മുഹമ്മദ് പൂക്കോയ തങ്ങളെയായിരുന്നു വിവാഹം ചെയ്തത്. വിവാഹശേഷം ഭർത്താവിനൊപ്പം വടകരയിൽനിന്ന് ആവിലോറ കാരക്കാട്ടേക്കും പിന്നീട് കാന്തപുരത്തെ അവേലത്തേക്കും താമസം മാറി. മാതാവ് ബീകുഞ്ഞി ബീവിയും അവരോടൊപ്പം താമസിച്ചിരുന്നു. അവേലത്തിൽ വീടുനിർമാണം നടന്നിരുന്ന ആദ്യകാലത്ത് ചെറിയ ഷെഡ്ഡിലായിരുന്നു താമസം. ജനവാസം കുറഞ്ഞ പ്രദേശമായിരുന്നതിനാൽ ഏറെ പ്രയാസങ്ങൾ നേരിട്ടിരുന്നെങ്കിലും പിന്നീട് അവേലത്ത് തറവാട് പ്രദേശത്തെ ജനങ്ങളുടെ പ്രധാന ആശ്രയകേന്ദ്രമായി മാറി.

ആതിഥ്യമര്യാദയിലും ജീവകാരുണ്യ പ്രവർത്തനങ്ങളിലും പ്രത്യേക തല്പരരായിരുന്ന ചെറിയ ബീവി, വീട്ടിലെത്തുന്നവരെ സന്തോഷത്തോടെ സ്വീകരിക്കുകയും അവരുടെ ക്ഷേമവിവരങ്ങൾ അന്വേഷിക്കുകയും ചെയ്തിരുന്നു. കുട്ടികൾക്ക് ചായയും പലഹാരങ്ങളും നൽകി സൽക്കരിക്കുന്നതിനൊപ്പം അവരെ ഉപദേശിക്കുകയും ചെയ്തിരുന്നു. ഇത്തരത്തിൽ ചായ നൽകുന്നതു കൊണ്ട്  ‘ചായമ്മ’ എന്ന പേരിലും അവർ അറിയപ്പെട്ടു. സക്കാത്തിന്റെ അരി അർഹരായവർക്ക് വിതരണം ചെയ്യുന്നതും അവരുടെ പ്രധാന പ്രവർത്തനങ്ങളിലൊന്നായിരുന്നു.

ആരാധനാകർമങ്ങളിൽ അതീവ നിഷ്ഠ പുലർത്തിയിരുന്ന അവർ നിരവധി വിർദുകൾ ജീവിതാവസാനം വരെ പതിവാക്കിയിരുന്നു. ദിവസവും കുറഞ്ഞത് അഞ്ച് ജുസ്അ് ഖുർആൻ പാരായണം ചെയ്തിരുന്ന അവർ ആത്മീയ ഉപദേശങ്ങൾ തേടിയെത്തുന്നവർക്ക്  മാർഗനിർദേശങ്ങൾ നൽകിയിരുന്നു.

ഭർത്താവും അഞ്ച് മക്കളും വസൂരിരോഗം ബാധിച്ച് അടുത്തടുത്ത സമയങ്ങളിൽ വഫാത്തായത് അവരുടെ ജീവിതത്തിലെ വലിയ പ്രതിസന്ധിയായിരുന്നു. ഈ നഷ്ടങ്ങൾക്കിടയിലും മനക്കരുത്തോടെ കുടുംബത്തിന്റെ ഉത്തരവാദിത്തങ്ങൾ ഏറ്റെടുത്ത അവർ അവേലത്ത് സാദാത്ത് കുടുംബത്തിന്റെ തുടർന്നുള്ള വളർച്ചയിൽ പ്രധാന പങ്കുവഹിച്ചു. കുടുംബത്തിലെ സുപ്രധാന തീരുമാനങ്ങളിൽ അവരുടെ അഭിപ്രായത്തിന് വലിയ പ്രാധാന്യമുണ്ടായിരുന്നു.

മക്കളിൽ മൂത്തവനായ സയ്യിദ് ഹുസൈൻ ഇമ്പിച്ചിക്കോയ തങ്ങൾ കുടുംബകാര്യങ്ങളിൽ ഉമ്മയുടെ അഭിപ്രായം തേടിയിരുന്നു. കുഴിമണ്ണിലേക്ക് താമസം മാറിയ ശേഷവും എല്ലാ വെള്ളിയാഴ്ചകളിലും അദ്ദേഹം ഉമ്മയെ സന്ദർശിക്കാനെത്തിയിരുന്നു. മക്കളും കുടുംബാംഗങ്ങളും വലിയ ആദരവോടെയാണ് അവരെ സമീപിച്ചിരുന്നത്.

മൂത്തമകൻ സയ്യിദ് ഹുസൈൻ ഇമ്പിച്ചിക്കോയ തങ്ങളുടെ വഫാത്തിന് ശേഷം റമളാൻ 18-ന് സയ്യിദത്ത് ചെറിയ ബീവി ബാഫഖി വഫാത്തായി. അവേലത്ത് മഖ്ബറയിലാണ് അന്ത്യവിശ്രമം.