Panakkad Sayyid Abdul Jabbar Shihab Thangal

കേരള സുന്നി ജമാഅത്ത് പ്രസിഡന്റായും കേരള സംസ്ഥാന ജംഇയ്യത്തുൽ ഉലമാ സെക്രട്ടറിയായും പ്രവർത്തിച്ച പണ്ഡിതനും സംഘടനാ നേതാവുമായിരുന്നു സയ്യിദ് അബ്ദുൽജബ്ബാർ ശിഹാബ് തങ്ങൾ. സുന്നീ സമൂഹത്തിൽ ഉരുത്തിരിഞ്ഞുവന്ന സംഘടനാ സങ്കുചിതത്വത്തിനെതിരിൽ നിലകൊണ്ട അദ്ദേഹം ഐക്യത്തിൻ്റെ അമ്പാസിഡർ എന്ന് വിശേഷിപ്പിക്കപ്പെട്ടു.

1957 ഒക്ടോബർ 12-ന് സയ്യിദ് അബ്ദുൽഖഹ്ഹാർ പൂക്കോയ തങ്ങളുടെയും സയ്യിദത്ത് ആഇശത്തുമ്പുഹ്റ ആറ്റബീവിയുടെയും മകനായി ജനിച്ചു.

പട്ടർക്കടവ് എൽ.പി. സ്കൂൾ, കക്കാട് ജി.എം.യു.പി. സ്കൂൾ, തിരൂരങ്ങാടി ഹൈസ്കൂൾ എന്നിവിടങ്ങളിൽ പത്താം ക്ലാസ് വരെയുള്ള ഭൗതിക പഠനവും, പട്ടർക്കടവ് അൻവറുൽ ഇസ്‌ലാം മദ്റസ, കക്കാട് ജുമാ മസ്ജിദ് ദർസ് എന്നിവിടങ്ങളിൽ മതപഠനം നടത്തി. 1978-ൽ വണ്ടൂർ ജാമിഅ വഹബിയ്യ അറബിക് കോളേജിൽനിന്ന് വഹബി ബിരുദം നേടി.

കെ.കെ. സദഖത്തുല്ല മുസ്‌ലിയാർ, കെ.എ. സമദ് മൗലവി, പി. മുഹമ്മദ് അസ്ഗർ മൗലവി, കെ. ഉണ്ണിമുഹമ്മദ് മൗലവി, പി. മുഹമ്മദ് മൗലവി എന്നിവരായിരുന്നു പ്രധാന ഗുരുനാഥന്മാർ.

40 വർഷത്തോളം തലപ്പാറ വലിയപ്പറമ്പ് ഖഹാനിയ്യ ജുമാമസ്ജിദ് ഖാസിയായും മുദരിസായും സേവനമനുഷ്ഠിച്ചു.

കേരള സംസ്ഥാന ജംഇയ്യത്തുൽ ഉലമയുടെ സജീവ പ്രവർത്തകനായിരുന്ന അദ്ദേഹം, സംഘടനയുടെ കേന്ദ്ര കമ്മിറ്റി ചെയർമാനായും, കേരള സംസ്ഥാന മദ്റസ എജുക്കേഷൻ ബോർഡ് ട്രഷററായും, ഏകദേശം മുപ്പത് വർഷത്തോളം കേരള സ്റ്റേറ്റ് സുന്നി യുവജന ഫെഡറേഷൻ പ്രസിഡന്റായും ബുൾബുൾ മാസികയുടെ മാനേജിങ് ഡയറക്ടറായും സേവനമനുഷ്ഠിച്ചു.  

സംഘടന പ്രവർത്തനങ്ങളോടൊപ്പം സാമൂഹിക സേവന രംഗത്തും സജീവമായിരുന്ന തങ്ങൾ, ജാമിഅ വഹബിയ്യ മാനേജിങ് കമ്മിറ്റി പ്രസിഡന്റ്, താജുൽ ഉലമാ മെമ്മോറിയൽ ട്രസ്റ്റ് ചെയർമാൻ, ദാറുസ്സുന്നയുമായി ബന്ധപ്പെട്ട മോറൽ എജുക്കേഷൻ ട്രസ്റ്റ് ചെയർമാൻ തുടങ്ങിയ ഔദ്യോഗിക സ്ഥാനങ്ങൾ അലങ്കരിച്ചു.

2018 ഏപ്രിൽ 10 (1439 റജബ് 24)ന് തന്റെ അറുപതാം വയസ്സിൽ അദ്ദേഹം വഫാത്തായി.