Sayyid Hashim Ba Alawi Cheriyakoya Thangal

പരപ്പനങ്ങാടിയിലും സമീപ പ്രദേശങ്ങളിലുമായി നിരവധി മഹല്ലുകളുടെ ഖാസിയും വലിയ ജുമുഅത്ത് പള്ളിയിലെ ദീർഘകാല മുദരിസും മതപണ്ഡിതനുമായിരുന്നു  സയ്യിദ് ഹാശിം ബാഅലവി ചെറിയകോയ തങ്ങൾ സയ്യിദ് അലി ബാഅലവി കുഞ്ഞി തങ്ങളുടെ മകനായിരുന്നു സയ്യിദ് ഹാശിം ബാഅലവി ചെറിയകോയ തങ്ങൾ. പിതൃസഹോദരനായ സയ്യിദ് കുഞ്ഞിക്കോയ തങ്ങൾ ബാഅലവിയുടെ മകൾ സയ്യിദത്ത് മുത്തുബീവിയായിരുന്നു ഭാര്യ.

1943 മുതൽ 1965 വരെ പരപ്പനങ്ങാടി ഉൾപ്പെടെ ഇരുപത്തിരണ്ടിലധികം മഹല്ലുകളുടെ ഖാസിയായി അദ്ദേഹം സേവനമനുഷ്ഠിച്ചു. അതോടൊപ്പം പരപ്പനങ്ങാടി വലിയ ജുമുഅത്ത് പള്ളിയിൽ ദീർഘകാലം മുദരിസായും പ്രവർത്തിച്ചു. പരപ്പനങ്ങാടി മഹല്ലിൽ തങ്ങൾ കുടുംബത്തിൽനിന്ന് ഖാസിയായി ചുമതലയേറ്റ ആദ്യ വ്യക്തിയായിരുന്നു അദ്ദേഹം. അതിനുമുമ്പ് മഖ്ദൂമി കുടുംബത്തിൽപ്പെട്ടവരായിരുന്നു മഹല്ലിലെ ഖാസിമാർ. 1960-ൽ മഹല്ല് ഭരണസംവിധാനത്തിൽ ജനാധിപത്യവൽക്കരണം നടപ്പിലാക്കിയപ്പോൾ, വ്യവസ്ഥാപിതമായ ഭരണഘടനയുടെയും ഭരണസംവിധാനത്തിന്റെയും അടിസ്ഥാനത്തിൽ പ്രവർത്തിച്ചിരുന്ന പരപ്പനങ്ങാടി മഹല്ലിന്റെ പ്രസിഡന്റായും അദ്ദേഹം സേവനമനുഷ്ഠിച്ചു.

മതപരമായ വിഷയങ്ങളിൽ വിട്ടുവീഴ്ച ചെയ്യാത്ത നിലപാടായിരുന്നു അദ്ദേഹത്തിന്റേത്. ദീനി കാര്യങ്ങൾ തുറന്നുപറയുന്നതിൽ ആരെയും ഭയപ്പെടാത്ത സ്വഭാവവും കാര്യങ്ങളിൽ അതീവ സൂക്ഷ്മത പുലർത്തുന്ന സമീപനവും അദ്ദേഹത്തിന്റെ വ്യക്തിത്വത്തിന്റെ സവിശേഷതകളായിരുന്നു. ഖാസിയുടെ അധികാരപരിധിയും ഭരണചുമതലകളും എങ്ങനെയായിരിക്കണമെന്നതിനെക്കുറിച്ച് മഹല്ല് സമൂഹത്തിന് പ്രായോഗികമായ ബോധം നൽകിയ വ്യക്തിയായിരുന്നു  അദ്ദേഹം.

പരപ്പനങ്ങാടിയിലെ ബയാനിയ്യ തുടങ്ങിയ പ്രസ്സുകൾക്ക് ആവശ്യമായ കോപ്പി എഴുത്തുകൾ തയ്യാറാക്കിയിരുന്നത് അദ്ദേഹമായിരുന്നു. അദ്ദേഹത്തിന്റെ കൈവശമുണ്ടായിരുന്ന ഒരു നഹ്‌വ് ഗ്രന്ഥത്തിന്റെ അരികിൽ സ്വന്തം കൈപ്പടയിൽ: “മാലികുഹു സയ്യിദ് ഹാശിമി (ചെറിയകോയ തങ്ങൾ) ഇബ്‌നു സയ്യിദ് അലി ജി (കുഞ്ഞിതങ്ങൾ) അൽബാഅലവി അൽഫനാതിയ്യി” എന്ന് എഴുതിയതായി കാണാം. അതിലെ “അൽബാഅലവി അൽഫനാതിയ്യി” എന്ന രേഖപ്പെടുത്തൽ പനയത്തിൽ ബാഅലവി കുടുംബ-ഖബീലാ ബന്ധത്തെ സൂചിപ്പിക്കുന്നു.

സയ്യിദ് ഹാശിം ബാഅലവി ചെറിയകോയ തങ്ങൾക്കും സയ്യിദത്ത് മുത്തുബീവിക്കും ആറ് പുത്രന്മാരും മൂന്ന് പുത്രിമാരും ഉണ്ടായിരുന്നു.

1965 ഏപ്രിൽ 19-ന്, ഹിജ്റ 1384 ദുൽഹിജ്ജ 2-ാം തീയതി തിങ്കളാഴ്ച രാവിൽ അദ്ദേഹം വഫാത്തായി. പരപ്പനങ്ങാടി വലിയ ജുമുഅത്ത് പള്ളിയുടെ മുൻവശത്തെ ഖബർസ്ഥാനിൽ, ഖാസിമാരുടെ ഖബറുകളുടെ കെട്ടിന് പുറത്തായി തെക്കുഭാഗത്താണ് അന്ത്യവിശ്രമം.